ممكن تقدمي البصارة باردة أو سخنة




النهارده بنقدم لكم طريقة عمل البصارة الشهية، علشان تقدمي لأسرتك طبق مختلف لو زهقوا من الأكل التقليدي والطبخ كل يوم..

البصارة
المقادير:
¼ كيلو فول مدشوش
2 ثمرة بصل
5 فصوص ثوم
2 ملعقة كبيرة زيت
ربطة كزبرة خضراء
½ كوب بقدونس مفروم
ملعقة كبيرة كزبرة ناشفة
ملعقة صغيرة نعناع جاف
ملعقة صغيرة شطة (حسب الرغبة)
ملح وفلفل

الطريقة:
1- اغسلي الفول ونضفيه، وانقعيه لمدة 6 ساعات في مية باردة، وبعدها اغسليه وغيّري المية، وارفعيه على النار، وحطي معاه بصلة، والثوم والكزبرة الخضراء، والبقدونس، وسيبيه على النار ساعتين على الأقل من غير تقليب، لحد ما يستوي تماما.

2- لما يبرد شوية، اضربيه في الخلاط لحد ما يبقى المزيج ناعم ومتجانس، وبعدها صفيه، ورجعيه في الحلة، وضيفي عليه الملح والفلفل والشطة والنعناع.

3- حطي الزيت في طاسة صغيرة وحمّري فيها بصلة، ومعاها الكزبرة الناشفة، وبعد كده وزعي البصارة على الأطباق، وزينيها بالتقلية.. وممكن تقدميها باردة أو سخنة، وبالهنا والشفا.

وبكده تكون خلصت وصفتنا النهارده..
استنونا بكره مع وصفة جديدة..
سلام..