الإدارة العامه للمرور .. نقآشكم .. حول تدبيل القسآيم .. واللي ضحيهـ يجييينآ ويشرفنـآ

بسم الله الرحمن الرحيمـ

مسآكم الله بآلخير والسرور


أنـآ ودي أعرف شيء وآحد بسـ

ليشـ كآتبيين ع القسيمه حد أدنى وحد أعلى

وهي شغـآله كل شهر تدبيييل

لي 3 شهور وكل شهر أرسل أتـآكد وآلقييهآ تزززيد

ولآ حول ولآ قوه إلا بآلله

إحن نلقهآ من وين ولآ وين


مآ بقى إلا القسآيم صآيره اللحين دين مآ ينتهي

وصآيررره أخس من البنووك من نآحيه ديينيه ربآ X ربآ

والله المستعـآن


واللي طفرآن ؟

ورآتبه على قدهـ

يجيه من هنآ

ورآح أقسآط وبالأخير بآقي ألف ؟

وش أسوي فيهآ اسدد قسآيم ولآ أكل وأشرب ؟


آهـ يآكبدي

والمشكله الكبرى ودك تسدد هآلقسيمه الوحدهآ مآ عرفت

لآزم تشيل اللي عليك يعني لو عليك مبلغ كبير وشغـآل يزيد

بآلله وش تسوي !


نـآقصين إحنآ فوق البلآ بلآ

أهـ بسـ <- صرخه موآطن

يآرب فرجك بس من لنآ سوآك


تعليقآتكم حولـ نظآم المرور الجديد

ومآ هو مدى ضررهـ على ( ذوي الدخل المحدود ومثآل الطلآب ولآ الكدادهـ


بإنتظآركم

عجبني نقلته لكم

واحد يقول :

هذا القرار المجحف نزل في شهر رمضان الماضي

وهو ينص على تدبيل القسائم كل شهر

حسبنا الله ونعم الوكيل

تخيلوا يا شباب كان فيه احد الشوارع كنت من يوم اعرف نفسي ادخل منه واخرج منه بالسيارة

طبعا هالشارع كان يؤدي في منتصفه إلى مدرسة ثانوية

المهم قبل فترة وضعوا لوحات عكس في بداية الشارع .. وأنا وغيري من اهل الحي عرفنا تلقائيا إن اللوحات وضعت بسبب الزحام الذي يتسبب به طلاب الثانوية عند حضورهم صباحا وخروجهم ظهرا ..

فمره من المرات في الليل بعد العشا دخلت من هالشارع وانا متأكد إن ما حطوا هاللوحات إلا للسبب إللي ذكرته سابقا

تفاجئت !!

لقيت قدامي تفتيش مروور سري

وربي العظيم اكثر من خمس سيارات بس بنفس اللحظة إللي دخلت فيها مسكونا كلنا وعطونا قسايم واحنا نصيح ونقول يا عالم يا ناس هذي حارتنا من يوم احنا صغار وندخل من هالشارع ونخرج وعارفين إن اللوحات عكس بفترة الدراسة من الصباح للظهر

قالوا بكل وقاحة : النظام نظام

سألت عن اسمه .. "ما كان معلق اسمه على البدله"

قال خير وش تبي فيه .. قلت بس ابي اسمك مو من حقي وليش ملزمينكم تحطوا اساميكم على صدوركم

قال بكل تبجح : ما لك صلاح !!

معقوله هذا تصرف رجل أمن

اتصلت على مدير المرور شخصيا وكلمته بالموضوع ويوم دخلت بالموضوع .. قال بكل كبر ونفخة صدر : اخلص وش عندك ؟!

إنا لله وإنا إليه راجعون .. وكأننا عبيد مذللين عندهم يدعسون على رقابنا وقسايم غصب عننا

عطيته الموضوع وقال اشوف لك الموضوع واشوف قصة هالعسكري وعطيته رقم القسيمة

الله لا يوفقه .. جيت بعد يومين لقيت القسيمة 500 ريال تسجلت ولا بعد شهر تدبلت القسيمة 1000 ريال

هذا الكلام قبل 5 شهور وعاد ما ادري كم وصلت الآن !!!!

حسبنا الله على الظالم

المرور مهمته الرسمية هو تنظيم السير في الطرقات والوقوف على الحوادث

لكن للأسف اصبحت مهمة المرور الرسمية هي حصد قسائم بأكبر قدر ممكن

ووضع الكمائن وكأننا في حرب ..

هذا واقع المرور عندنا

إلى متى هذا الوضع ؟! الله وحده أعلم

اشكرك اخوي من صميم قلبي على طرحك للموضوع المهم والذي وجدت فيه مرتعا لأفضفض عما في داخلي من القهر والحزن والأسى .

آآآآسف على الإطالة

تحياتي

واحد قلبه مفقوع من النظام يقول :

النظام صراحة قهر

وين مشائخنا حقين تحريم وتحليل الاسهم والاكتتابات ؟

ههههههههههههههه

على العموم والله مافيه احسن من السيكل ولا لابغيت مكان اقرب تكسي

منها ترتاح واذا مريت تفتيش يطرطع الشرطي تكلم من راس خشمك ولاعندك فيه

والله السياكل والباصات فله خصوصآ حقة البطحى ابوريالين هذاك وخل القسايم تاكلها الارضه عندهم لابارك الله بالي حط هالنظام

عندما يكون المواطن هو الحلقه الأضعف توقع كل شي

نظام أبتزاز عيني عينك

اللهم تولنا فيمن توليت

وعافنا فيمن عافيت

ها والسلام !

بعدين ياخي ادفع راتبك ماهو 20 الف وعندك فله وسيارتين ؟؟؟؟؟؟

هذا تصريح مسؤل يقول اقل مواطن سعودي عنده الاشياء الآنفة الذكر

ياكثر اللي مفقوعة قلوبهم من هذا النظام :

يا اخوان النظام خلاص وضع وتم صدوره ولكن ادعو ان الله ان الي وضع النظام يصيبه بمرض اين كان .

اما بخصوص الاخوان الي يقولو لا تخالف اخوي اساسا بعض رجال الامن مافيهم خير يلصق القسيمه في ظهرك حتى لو انك متابع للقوانين يجيب لك اي عذر علشان يعبي الدفتر الي معه علشان ياخذ اجازه واذا ما خلص الدفتر بيلطع عندهم ويجلس مرابط

ذولا ناس قالوا ايش عندهم .. أنت ماهو رأيك في النظام


هات رايك

في اخر احصائيه لنسبة الحوادث وجد ان السعوديه هي الاعلى على مستوى العالم
ونسبة الوفيات في الحوادث هي الاعلى ,, الحقيقه انا اعيش في منطقه مافيها مرور والله ولا سياره مرور وحده تخيل كيف الوضع ,, تصدق كل الحدائق عفواً هي كلها حديقتين واستولوا عليها الشباب وتجد التفحيط من كل صوب ولايستطيع الشخص الخروج بعائلته ابداً ,, والنظام هذا نعم فيه اجحاف نوع ما ولكن الحقيقه انا ادعم كل شى يساهم في منع المخالفات المروريه واتمنى لو يطبق النظام بحذافيره .. كم من الاسر ذهبت ضحية المستهترين كم من الشباب كم من الاطفال زهقت ارواحهم بسبب مستهتر يقطع الاشاره لانه يعلم ان عقوبته غرامه ماليه بسيطه والديه على شركة التامين ..