أين الرحمة ياسعادة الملحق؟

القصة وباختصار....

واحد من اصدقائي في السعودية تخرج من الثانوية ومثله مثل اي طالب رغب بالاتحاق في احدى

الجامعات في السعودية ولكن لم يستطيع الالتحاق باي الجامعات في السعودية فدلوه بعض الناس

اللي عندهم خلفية عن الجامعات الخاصة هنا في مصر وبالفعل قدم في احد مكاتب التسجيل في

في السعودية وجابوله قبول في جامعة ام اس اي على حد قوله......وبعد ما جاه القبول ادى

امتحان المقابلة اتحديد مستوى الطالب التي تشترطه الجامعه عند القبول...وابوه كان مريض فجات

امه الخمسينية لمصر عشان تتمم اجراءات القبول في الجامعة ولما راحت جامعة ام اس اي ودفعت

الرسوم وخلصت كل الاجراءات اللي طلبوها منها قالولها باقي طلب واحد وهو تجيبي خطاب من

الملحق الثقافي انه نقبل ابنك عندنا في الجامعة....ولما راحت للملحق ابو عبدالعزيز المزعوم

كانت المفاجأة انه تنرفز عليها وصيح في وجهها ويلفظ بعبارات ما يليق ان تذكر امام احد امهاتنا

يقول:

(هذه الجامعة... انا اوريها شغلها هذه الجامعة....كيف تقبل ابنك بدون خطاب مني... وترد

عليه تقوله انا ماني عارفة الاجاراءات ولاني فاهمة شي وكل اللي انطلب مني نفذته ولو كنت

ادري كان جيتك...

يرد يقولها انتي ما تفهمي... اي اجراءات هذه اللي تصير من غير خطاب مني؟ وبلهجة

قاسية ووجه عابس....وينادي السكرتارية ويقول اكتبوا خطاب اسحبوا قبوله من هالجامعة

واكتبوا خطاب ثاني سجلوه في جامعة المستقبل ويرد عليه السكرتير يقوله ما يقبلوه

في التخصص اللي يبغاه قام رد الملحق يقول سجلوه في اي تخصص حاسب او اي تخصص)

المسألة مو مسألة استوفاء شروط فقط يا سعادة الملحق المسألة مسألة اسلوب الحرمة

ما تعرف شي من الاجراءات المفروض تنورها تفهمها النظام بدال ما تنهار في وجهها بهالاسلوب

اللي محد يقبله ...


والله يا أخوان خرجت الحرمة تبكي وهيا في مقام امهاتنا واتصلت علي تبكي ولا عرفت اوقف بكائها

والحرمة لها كم يوم مريضة وما خرجت من البيت بسبب هذه الصدمة...

وكان ردي...اني استعجبت ابو عبدالعزيز رجل طيب ما يصدر منه هالشي واحنا لنا تعاملات كثيرة

معاه وهوا ملقب ب(أستاذ التخدير) لكن هل هي اذا جيت رايح كثر من الفضايح؟ ولا التخريف قبل

النهاية؟....انا ما ارضى امي توقف في موقف زي هذا في يوم من الايام... وخاصة من رجل

زي الملحق الثقافي يعتبر قدوتنا وابونا الروحي في الغربة والمفروض اننا نتعلم من افعاله..... اتريدنا

ان نتعلم الجلافة منك ياسعادة الملحق؟ انسيت وصية رسول الله عليه الصلاة والسلام(رفقا

بالقوارير) ام وصيته في كثير من الاحاديث بحسن الخلق.... اين الحلم لديك؟ اين الصبر؟ اين

الدبلوماسية؟ ام هيا دبلوماسية ورق فقط...

ياسعادة الملحق اوصيك انك تسخر منصبك لنشر الخير والرحمة بين الطلاب بدل ما الطلاب نافرين

من الملحقية بسبب اجراءاتها الكئيبة وتسلط الموظفين على الطلاب وانت ولا كأنك موجود...

ليش هالخلق الضيق اللي فيكم ياموظفين الملحقية؟ وكأنكم بتعطونا هالمكافات من جيوبكم

والله يوم ادخل الملحقية وعندي اي اجراء ابي اسويه احس اني قاعد اشحذ...من ردودهم الفظة....


ولا ابراهيم الحصيني مشرف الجامعات الحكومية... يوم يجيه واحد يدرس في كلية الطب في

جامعة القاهرة الجامعة المعروف عنها بشدة اجراءاتها وتكثف موادها الدراسية ولا رحمة فيها ورغم

كل ذلك الطالب نجح بتفوق ولما راح يبي مكافأة تفوق نفر في وجهه ويقوله زيك زي الطلبة

الثانيين مافي فرق .. يقوله انا ما طلبت انك تفرق بيننا لكن انا ابي استعجل صرف المكأفأة عشان

انا مسافر...يقوله انت ما تفهم ما اعطيك شي الحين وقام خرج من المكتب وعطاه ظهره والله يا

اخوان هالحركة صارت قدام عيني...

والرشيد المالية اللي تقول ان الفلوس بتطلع من بطنه يجيه ذاك اليوم واحد معطيه ورقة افادة

بسداد الرسوم والورقة مافيها لقب الشخص على حسب عرف المصريين ما يكتبه اللقب

مكتوب اسم الشخص وابوه وجده وهكذا...رد الرشيد يقوله انت مين؟ يقوله انا اللي في الورقة

يقوله ما اعرفك مافي لقب.. يرد الطالب يقوله انا طلبت من الجامعة افادة سداد رسوم وهذه هيا...

هذا مو ذنبي....وقعد يطلع حجج لفترة وبعدها قبلها وما كاد ان يفعل....

الى متى ياملحقية؟ الى متى سعادة ياملحق؟.... هذا التعقيد وهذه الافعال السيئة التي لا تليق

بمستوى دولتنا المملكة العربية السعودية ......الدولة التي يطمح الكثير من الناس في هذا العالم

للانتماء اليها لانها بتحترم رعاياها وتنصف مظلوميها ولا يضيع حق لدى صاحب حق فيها.....

وافعالكم المناقضة لوصايا خادم الحرمين الشريفين اطال الله بقاءه على الرعايا السعوديين

وخاصة الطلبة منهم....بهذه الطريقة تعتبرون خائينين هذه الثقة التي وهبكم اياها خادم الحرمين

الشريفين والمسؤولين التعليميين من بعده....ولا تنسوا قدرة الله عليكم...

أسأل الله ان يسلط الظالمين على الظالمين وأن يخرجنا منهم سالمين...

المستشار الفوهور