خسيتي لعنبو جدك خسيتـي والغلـط ينعـاب

خسيتي لعنبو جدك خسيتـي والغلـط ينعـاب
خسيتي واقلبي وجهك ؛ ولا كلمـه ولاجابـه

خسيتي والزمي حدك تراهـا ضاعـت الاداب
انا لاطاشت جنونـي يعـرف الجاهـل ادابـه

وش المغزا من الكلمه بلا داعي بلا الاسبـاب
وهرج الكذب والتجريح قوليلـي وش اسبابـه

انا الشرهه علي اني فتحت لخافقي كـم بـاب
ولكن مثل ماجيتي تـرا كبـر الجمـل بابـه

خذي نفسك معك برا ثم انقلعي بـدون إيـاب
فمان الله والا اقول فمان ابليـس واصحابـه

تحسبيني على فرقاك ابندم واغـرق الاهـداب
انا مبسوط يوم اني طـردت الشـوم وغرابـه

انا ما اعاشر الخاين ولا اسمع هرجة الكـذاب
ومثلك قيمته عندي تحـت الزيـرو حسابـه

هذاك اللي تحبينه حقيـر و خكـري ولعـاب
عاجبك ان قذلته شقراء ويميّل بالشعر كابـه

صحيح انه حقير و زين وشكله للنساء جـذاب
تشّبه بأختـه فلانـه ومنهـا الـدم متشابـه

وانا مانيب حرف الجر ؛؛ تجرينه على الاعراب
انا حرف(ن) جزم نفسه ومثلي يصعب اعرابه

تشوم النفس عن زينك عقب ماطاح فيها ذباب
وانا حر(ن) ولد حر تركـت الزيـن وذبابـه

انا يابنت من ربع(ن) لهم فوق الفخر محـراب
انا من روق ياخبله وربعي الهيله ( عتابـه )

نسيا ماكلى (عمهوج) وكم روس بدون ارقاب
رزقك الله بحكم اللي حفظ عمهوج في جرابـه

انا شيخ(ن) ولد شيخ بذكره تنعـم الانسـاب
اليا قام العرب كـلاً يراجـع دفتـر انسابـه

ولد شيخ(ن) وسط ربعه له بين الرجال حساب
اليا ضاقت به الارياء يهـز الارض مشعابـه


محنكني على الطيبه من يومي صغير وشـاب
اجل وش رايك بطفل(ن) دلال القهـوه العابـه


ترى بدري على مثلك تعيب وساسها معيـاب
ياليت اللـي يعيبنـي يحـاول يستـر ثيابـه
انا لاجتني الزله مـن الجاهـل وهـو كـذاب
تركت القافله تمشـي وراهـا تنبـح كلابـه

وانا ليامن كشف ان الخوي اصبح لسانه داب
نزعت السم من عرقه وكسرت بمخلبي نابـه

خلاص اليوم يافلانه كرهتك والقلوب غـراب
وترى كل طير(ن) بكبد السماء يشبع مخلابـه

خساره مثلك بقلبي تضمـه غرفـة الاحبـاب
وخساره غلطة العاشـق يحطـك اول احبابـه

بعد هذا تبين ارجع لاجل عينك نصير اصحـاب
خسيتي واقلبي وجهـك ولا كلمـه ولااجابـه



تحياتوووووووووووووووووووووو,,,,,,,,,,,,,,,,,,,,,,,