عتاب النفس

الا يابن السبيه مـا قـدرت اتحمـل الأهـات=تعب عمري تعب قلبي من الدنيـا ومـا فيهـا
يسير الوقت في حسره ثوانينا غـدت ساعـات=عقارب ساعتـي دارت الا ماصعـب تلاقيهـا
غدا همي بشرياني وغير في دمـي صبغـات=بلون الحـزن تتلـون شرايينـي اومجاريهـا
الا هم الحزن يرحل تداعـت فينـي العـلات=تقول ان الحـزن قسمـي وعلاتـه مخاويهـا
شكا قلبي على نفسي يقول اتعبنـي الويـلات=بكت نفسي من الحسره تقـول الهـم لاويهـا
غدا الاثنين في حيره شكوا للعين في حسـرات=تقول العين انا عنكـم دمـوع الهـم اداريهـا
اجوب الارض واتجول ادور صافي النسمـات=ادور عن هوا صافي مـن الدنيـا اوبلاويهـا
بها الدنيا تعب قلبي ولا عاد بالعمـر مـدات=اخاف الوقت يسرقني وروحي فـي تماديهـا
احس الناس ماهي ناس اشوف اختلت النيـات=تجامل من يجاملهـا وتمسـح كـل ماضيهـا
وفي زحمة ظروف الوقت تهاوت قيمة الشيمات=غدت ماضي وهدوها تهـاوت مـن عواليهـا
ابهذا الوقت لا تامل ولاتعقـد بـه الهقـوات=ترى كم واحـد صفـى حلـومٍ كـان بانيهـا
بغفله تسرق احلامك وتتهاوى بـك الميـلات=لابـد انـك تسايرهـا لا بـد انـك تداريهـا
الا ليت العمر مسجد ولحظاتي بـه الركعـات=ونفسـي كـل ماتغفـل احاسبهـا واعاتبهـا

الله عليك وماشاءالله عليك وعيني عليك بارده
كعادتك مبدع وكعادتك شاعر انيق شاعر
مرهف الاحساس وهذه القصيده كل بيت من
ابياتها يسوا قصيده صح لسانك ولا فض فوك

الا ليت العمر مسجد ولحظاتي بـه الركعـات
ونفسـي كـل ماتغفـل احاسبهـا واعاتبـهـا


رووووعة هذا البيت

وهذا رد مني على قصيدتك ياالهمس
وعسى ان ينال ولو بعض الرضا

	سلامت قلبك المسكين ياسيدي من التعبات....سلامت خاطرك من ضاهر الدنيا وخافيها عسى وقتك يحن وتبتعدعن قلبك الضيقات.....وعسى عينك ترى سعد الليالي في دواريها وترضا لين ماتصفا الحياة وتنجلي الغمات....وتفرح لين تفنى ضيقتك ويموت طاريها يصيرالفرح قسمك والحياه تصيرلك بسمات...وتضحك لك حياتك والفرح يمحي مساويها ولا تشكي ولا تبكي ولا تتعرّض الميلات......تعيش بدنيتك مبسوط والفرحه تباريها وتطرب لك سنين العمر وتقسّم لك النغمات....على اوتار السعاده تصدح الدنيا بااغانيها تصير الارض لك واحه وسيعه كلها جنات....تشوف اغصانها يبهي ثمرها وانت جانيها ولكن غرسة الصبّار ماتلقا لها فيات ........وهي غرسه رديه خايبه ماحد يدانيها مادام ان القدر مكتوب وايام العمر لحظات....ترى ياصاحبي مابه على الدنيا مشاريها اقول استغنم الفرصه متى زانت لك الاوقات....كما قالو ليالي العيد تعرف من عصاريها وتلقا صاحبً ونعم يعينك ساعة الحاجات....... ولا تلقا مية صاحب الى بانت مواريها ترى الايام دواره بعد تكشف لنا الغيبات.......تجنّب عن طريق اهل الندامه لا تجاريها ابا قل لك نصيحه لوتركتها تقل هيهات......اقل خذ ماتيسر واترك الدنيا لواليها

ام رتيبه طالما تنيريني بتواجدك وهذا شرف لا انكره ومجرد تواجدك هذا وسام اعتز به
اخت غاليه وعزيزه
تحياتي لك ايتها الرائعه
انتي مبدعه وجميله بكل حرف تكتبيه لنا ايا كان فموطن الطيب لا يخرج الا طيبا تحياتي لك اختي


السبيه وما ادراك ما السبيه

السبيه حظر وحظر الجمال
يا اخي انت مبدع وجميل انما من يرى
تستاهل الوسام يا جميل ولو انك هنا تستحق اكبر وسام على مجاراتك الجميله

انما من يرى
تحياتي لك ولجميل كلامك
اخوك الهمس