شد الرحال

هذه اخر انتاج علي السبيه الغلبان وترى عندي طفرة قصايد هذه
الايام واهي من الفضاوه مامعي الا القصايد تواسيني واواسيها

من المرابع لو بغيت اروح واشد الرحال=لقيتها ماتنصخي اللي عامها كله ربيع
واهل المرابع كل ابوهم من قرانيس الرجال=وانا مع اصحاب الوفا مبسوط والخاطر وسيع
صحبه على طيب او ندى واشوار واعلومً هيال=وانا من اللي يشتري مدح النشاما مايبيع
وقلت ياقلب انتسم مالك من الديره انتقال=الديره اللي كرّمتك وفي سماها اسمك سطيع
ديره احتفت بك لي غدى لك في مرابعها مجال=خلك لها سيفً ودرع وحصن والصور المنيع
حتى ولو دوّرت مافي ضنتي تلقا مثال=للديره اللي حسنها زاهي وفي شكله بديع
ديره تضم اغلى تواصيف الحلاوه والجمال=يكسي مناضرها الرضا والبهجه والوصف الطليع
محال ياقلبي تلاقي مثل هاالديره محال=واللي على سنّه ومذهب لا يتوه ولا يضيع
وبيت واحد من شعر يغنيك عن مية مقال=للشاعر اللي لا بنا القيفان في نضمه بريع
شعره سحابه والحروف امطار والمعنى خيال=يحيي القلوب وترتوي منه المشاعر وابتطيع
مثل الغرابيب الثقال السود واركان الجبال=الثابته اللي ماتزحزحها العواصف والهزيع
مثل البحور الهايجه مثل الندى مثل الزلال=مثل الزمان اللي عمره الطيب والوقت النفيع
تدوم يالشعر الذي مافيه نقد ولا جدال=اغلى من اوصاف الغلا واصفى من الماي النبيع
اشرب فناجيله وهي تنصب من صفر الدلال=واسمع تراحيب المعاني لاغدت حولي جميع
يطيعني نضم القصايد يوم انادي له تعال=واطوّع المعنى وبيت الشعر في نضمه وديع
وفي البدايه والنهايه بااسم ربي ذو الجلال=وصلاة ربي والسلام عليك ياالهادي الشفيع