لاتلوم

لاتلوم الجاذبيه لاغدا قلبك حطام=طاح من بين الضلوع ومزقته الادميه
القلم مرفوع عنكم ماعلى العاشق ملام=والخطا والعمد واحد ماعلى العشّاق ديه
ماتهنا باالحلال ولا اكتفا ذنب الحرام=ولاخذا باقي جزاه ولاسلم شر الاذيه
مادريت ان المحبه موتها راس السهام=تطعن القلب التقي وتعكّر الروح النقيه
من دخل دنيا المحبه لاهيا قلبه يضام=روح تبريها الهموم وروح تخطفها المنيه
والذي حضه وقف له في جلوسه والقيام=كلها ايامه تعود في هموم وحزنويه
المحبه باالرضا ماهي بعند ولا خصام=وانها ماتصلح الا للقلوب السمحيه
والقلوب اللي تتوّه في دهاليز الضلام=ماترى نور الكواكب والنجوم اللي مضيه
البشر تحيا وتفنا وان لله الدوام=ليت راع الحب يحذر قبل يسقط في الخطيه
يسقطون التكلفه مابينهم والاحترام=المهم ان السمي يبلغ مراده من سميه
وين تلقا حب صافي من طوابير الزحام=شال قلبه في يده واعطاه محبوبه هديه
اتجه للغرب والا حول ادروبك للشام=وابتشوف اهل الطرب واهل القلوب المونسيه
وان تعدتك الوقوت الطيبه والنجم طام=واشتكيت من الحظوظ الخايبه والعثريه
ادخل المسجد وصف مع البشر خلف الامام=وادع ربك في سجودك ينتزع ماالقلب غيه
غير لوجا للمشاعر داخل القلب احتدام=تطحنه طحن الرحاه وتخلي اوهامه مديه
من يعزي قلب حي(ن)مات حسه من عوام=ومن يرد الوقت الاول والسنين اللي قضيه
انطفت نار الوجار وطاحت عمدان الخيام=بعد ماقالو البديوي شال في جيبه هويه