كل ممنوع مرغوب

يااهل الاوامر كل ممنوع مرغوب=والضغط تتفجر عروقه غبونه
والنصح والارشاد للناس مطلوب=لكن ماياجي المنصّح بشونه
اهل اللحا من طاعهم صار محسوب=واللي يخالف رايهم يبطلونه
واللي حلق دقنه غدى كله اذنوب=فااعيونهم كم واحدً يحقرونه
والدين يسر ولالنا غيره ادروب=والله غني عن كل من يعبدونه
وترى الوسط للدين ياناس منسوب=اللين يعصر والقسا يكسرونه
والله خلقنا احساس واشعور واقلوب=وابني ادمي روحه غذاها عيونه
والوصل بين ارواح واقلوب واشعوب=الله يقطع كل من يقطعونه
ياما شربنا المرّ كوبً ورى كوب=وياما صرفنا من شقا الوقت مونه
تهنا وضعنا وحالنا صار مغلوب=مغلوبً امره بيد من يكبتونه
مشرّقين وتالي الناس بغروب=ومستسلمين وحالنا يغصبونه
من سبّة اللي فعلهم جبر واغصوب=مافي تعاملهم ليون ومرونه
حطو بقول الحق خمسين عذروب=واما كلام المجتهد يفرضونه
كنهم ولاة الامر والطارف ينوب=ودرب العسر في نهجهم يطرقونه
انحل من عقل الفتى كل سكروب=وصابت اقلوب العباد السخونه
رحنا لهم في ساحة الجهل ملعوب=والامر لو ماطاعهم يفترونه
ترى الحياه ماهي بزادً ومشروب=وثوب من فوق الكعب يغبنونه
من طالب التحرير سموه معتوب=تحرير فكرً كملهم يسجنونه
هذا بلدنا كل مافيه محجوب=من ودهم حتى القمر يحجبونه