حياة الهــــــــــــــــم والصمت الرهيــــــــــــــــــــــب

هذه إحدى قصائدي المتواضعه والتي أضعها بين أيديكم لعلها تلاقي رضاكم واستحسانكم

ياحياة الهم والظلمات والصمت الرهيب=مايمدّ النور كفـّه في دياجير الظلام
حتى لومدّيت له كفّ الرّجا مايستجيب=واكثر التلميح مايغنيك عن بعض الكلام
وان لَمَحته لمحة المختاف للرجل المريب=صدّ عنّي رغم ترديدي عبارات السلام
ماتحزّمت الرّدى واموت ماني له صويب=حتى لوشان الزمن مابيع درعي والحزام
طعنتي ماهيب في جنب الموالي والقريب=لا ولاهي طعنة المقفي ولو راعي الخصام
الجمايل والعوايد تركة الجدّ العريب=وانا وارثها وتدري ما على الوارث ملام
غير ماساعدني النوماس والعقل اللبيب=أرتجي قطع المسافه وآتعثـّر في الحطام
من مجاهيم الليالي ماتبقـّى لي حبيب=مابقى لي غير حضن الليل واطياف المنام
كلّ مااصبح صبح صار الكون في عيني غريب=والحميّه ماتساعدني على وضع اللجام
يازمان الهمّ لاتجرح وانا مالي طبيب=روح واترك كل جرح ٍ بعد غدرك في سلام
كم رميت العزم في مقتل ولكنـّه يطيب=ثمّ ترجع تنسج الخطـّه تدوّر لي عدام
لكن اللي جنبه الرحمن والله مايخيب=والمعونه من عظيم الجاه توصلني المرام
ماردعني في الحياه الاّ حرام وشيّ عيب=غيرها ماللعزيمه حدّ في دنيا الزحام
الطـّموح الصادق ابلغ من خطابات الخطيب=جامح ٍ ماروّضه غير المطاليق الكرام
انشد التاريخ والتاريخ شمسه ماتغيب=أنشده عن سيرة الأخيار في ماضي الأنام
عن رجال ٍ نالوا الأمجاد في الوقت العصيب=ما لشِدّات العظايم غير شَدّات العِظام
من سيرهم ناخذ الجمره ونوقدها لهيب=في قلوبٍ صابها من حالة الأمّه فصام
إن تكلـّمنا عن الماضي عجايب ياعجيب=وان تكلـّمنا عن الحاضر يسكـّتنا الحسام
يوم شابت روسنا من قبل يمديها المشيب=كنـّها ماشابت الاّ لجل تنوير العتام
يابياض الشيب وش باقي من احزان النـّحيب=غير تطفي شعلة الثوره وراعيها ينام
إلاّ لو يفنى غدر جسّاس مع طغوة كُليب=أو يمدّ النور كفـّه في دياجير الظلام

أخوكم / أبو مطر


تحيااااااااااتي