اهل الثياب القصيره واللحا الطويله ( المطاوعه )

بهذه العباره كان صاحبنا الله يستر عليه يستهزء بالمطاوعه وكان دايم ينتقدهم ويصفهم باهل الثياب القصيرة واللحا الطويله

كان يكرههم ويبغضهم ولايحبهم لاشاف مطوع كنه شاف عفريت لدرجة انه اذا جانى فى المكتب وشاف عندى شاب أو شايب ملتزم ينقلب وجهه وينسحب واذا راحو يرجع لى ويقول لى وش يبغون أهل الثياب القصيره واللحا الطويله مسنترين عندك أرد عليه واقوله ياخي هاذا صديق والثانى له معامله والثالث يبغى يقابل سمو الامير يرد على ياخى مدرى ليش ماحبهم ولا اطيقهم حاولت أحسن له الصوره عنهم ولكن أكتشفت ان كرهه لهم من الصميم للصميم

المهم ماطول عليكم دارت الايام وجاني اللى يكره اهل الثياب القصيره واللحا الطويله يشتكيلى انه طفشان ونفسه يطلع طلعة بر

قلت جابها ربي وعرضت عليه طلعه من يوم الاربعاء للخميس فى مخيم فى العاذريه مع شباب يحبهم قلبه

قالى تكفا بطلع معكم بحكم أن صدره ضايق وطفشان

وانا وافقت وشرطت عليه مافىه رجعه الا يوم الجمعه ونطلع بسيارتي ووافق

المهم

مريته يوم الاربعاء الساعه 4 العصر وركب معي الرجال وقالى شوف وديت عيالى عند اهلهم عشان نفلها ربوع وخميس وجمعه مع اخوياك اللى فى المخيم

قلتله أوكيه ماعندك مشكله بس لاترجع فى كلامك واول مانوصل للمخيم تزعجني وتقلي برجع لبيتي

الرجال تحمس وطلق أنه مايرجع الا يوم الجمعه


الزبده وصلنا للمخيم ونزلنا واستقبلونا الرجاجيل والاكلهم شباب ملتزم ( مطاوعه )على حد قول خويي وتعبيره أهل الثياب القصيره واللحا الطويله وانقلب وجه خوينا وتغيرت ملامحه وهمسلي فى أذني هاذولا وش جابهم للمخيم

تبسمت بوجه خويي وقلت له لاتحكم عليهم اللحين أحكم عليهم يوم الجمعه وتراهم هم المعزبين وحنا الضيوف واحترم نفسك



المهم الجماعه ماقصرو أحتفلو فينا فى نفس اليوم الاربعاء اللى هم الشباب الملتزمين (المطاوعه ) نزلو الذبيحه وذبحوها وسلخوها وحنا طبعاً معهم نساعدهم حتى خوينا اللى يكرهم معنا يساعدهم وباقل من ساعه أرتاح لهم وصار معهم يساعدهم ويضحك معهم ويطبخ معهم واطالع والا خوينا داخل جو معهم ضحك وسوالف ووناسه ويجهز العشا معهم ويحلف على ذا انه مايحط ايده ويفزع مع ذا انه مايسوى كذا المهم حطو العشا وتعشينا وبعد العشاء ضبطو القهوه اللى يحبها قلبك وسوالف وضحك لين الساعه ثلاثة الصبح عندها كل واحد جهز فراشه ونام لين الساعه خمسة وربع الفجر وصحانا الشيخ فلان لصلاة الفجر وقمنا كلنا وصلينا جماعه وتم تجهيز القهوة بعد الصلاة مع منظر الشروق تقهوينا وطلعنا للصيد ورجعنا للمخيم قبل الضهر معنا صيدنا وصلينا الضهر مجموعه منهم تكفلو بالطبخ والمجموعه الثانية طقوها لعب كرة طايره تغدينا وصلينا العصر وبعد الصلاة لعبنا كرة قدم لين المغرب وصلينا المغرب وبين صلاة المغرب والعشاء جهزنا للعشاء وبعد صلاة العشاء مجموعة تطبخ ومجموعه تضبط الجلسه تسوى قهوه وشاهي وجنزبيل ونعناع وسوالف فى الخيمه تعشينا وحمدنا الله وسمرنا على ريحة السمر وسوالف ليل كل واحد يقص حكايه ممزوجه بخفة الدم لين نمنا المهم رجعنا لبيوتنا قبل صلاة وصلى كل واحد فى مسجده مع جماعته

تبون تعرفون نهاية الحكاية

خويي اللى كان يكره المطاوعه صار من أعز أصدقائهم وهم صارو يعزونه ويغلونه مره وللاسف هالغدار صار يطلع معهم كشتات ولايقولي هههههههههههه اوووف


أقسم بالله أن هالقصه حقيقيه والله طلعة البر مع الشباب الصالحين المهتدين انها تسوى الدنيا ومافيها يعطون للكشته طعم خيالى ورائع الله يثبتهم ويهدينا اللهم أمين


وأقسم بالله أن خويي بعد هالطلعه صار من المهتدين والملتزمين وغير نضرته وكلمته المشهورة وصار يقول الكشته بدون اهل الثياب القصيره واللحا الطويله مالها طعم وكل ماقابلته يدعيلي ويقبل راسي الله يحفظه ويثبته على الدين والصلاح


ودمتم بود

اخوكم محب منتدى رباع