في لقاء الود

في لقاء الود في يوم (ن) جميل= يا الله اجعل جمعنا في كل خير
مرحبا ما ناض براق (ن) وسيل = في لقاء اجمل من اليوم المطير
بعدها فكر وقيّس يا مثيل = ما نبي الا بهجة الخاطر تسير
اجتمعنا والله الوالي وكيل = ندعي الشور الحسن بامره يدير
جمعنا لا يفرقه قولا (ن) وقيل=قالها شاعر في الدنيا خبير
من يعارض نهضة دياره بخيل = من وقف في ضدها ما له نصير
مسألتنا ما تبي حط (ن) وشيل = ما تبي الا فتل شور (ن) من مشير
مسألتنا ما تبي بندق وخيل = مسألتنا تبغي العقل المنير
يا وجوه الخير لا يعمى الدليل = كلمة الحق ما نغيرها بغير
جتكم الفرصه كما شمس الأصيل = كيف يعمى راعي النون البصير
ادري ان الحمل يا ربعي ثقيل = لكن انه قبلكم يصبح صغير
لا بغينا التمر نعنى بالنخيل= وابشروا بالخير والجود الوفير
اي سبيل الخير ما غيره سبيل = يا قرون القوم يا عزوة جرير
المهم من دربنا العايق يحيل = والاهم الصدق واحسان الضمير
يا وجوه الخير ما شيء مستحيل = لا تكاتفنا صغير (ن) والكبير
ابو متعب بالوفاء كفه يهيل = وولي العهد يا طيب الامير
وان نايف راعي الفعل الجزيل = والعداله قرها حي الوزير
العفو والعذر ما نبغي نطيل = والصلاة على النبي الهادي البشير