قصيده مطروحه للنقد والتوجيه وهي أول محاوله لي وقد تكون الاخيره...

بعض العرب لامرّني زادني شوق=وعاد لي تاريخ ماضي سنيني
عذب الّلما يرويك عن كل منطوق=ويبري الجرح العميق الدّفيني
صحرا ضماي بشوفته رعد وبروق=تمطر سماه وكل غصنن يليني
حبّه وزى مايشغله جنس مخلوق=أقهر به اللي عافني مايبيني
ماهوب لاعرض وطلب داخل السّوق=وإلآ بضاعة حضرمي مايديني
عواطفي ماتقبل الغشّ والبوق=صبور لو زاد الشقا والحنيني
ماني خفيف ويقلب الهرج مطفوق=غثّ الكلام أميّزه والسميني
والليل لو ظلّم يجي بعده شروق=حتى ولو عاند فواد الحزيني
والمعذره ياأصحاب الاشعار والذّوق=هذا المجال أهواه مايهتويني

وسلامتكم...