%%% (( كريم يابرق )) %%%

كريم يابرقٍ سرى تالي الليل=
والرعد يـزفي بالمزون المهلّه=
هذا يشعّ..وذاك يصرخ بتبجيل=
والله وأعلم ياعرب وش يقلّه؟=
في منظر الاثنين حكمه وتمثيل=
مثل الخليل اللي يناديه خلّه=
ليته بمكنون الدجون الهماليل=
اللي مداها بـين شدّه وتلّه=
و اللي تبشّر مطلع الورد بالسيّل=
لا ماتـت أغصانه و لا راح ظلّه=
يمطر على دار الغظـي نافل الجيل=
محصور حول أرضه ويسقي محلّه=
أبو الرموش الناعسات المظاليل=
اللي جمع في وجهه الحسن كلّه=
و اللي جبينه يكسف البدر وسهيل=
تخجل منه كل النجوم المطلّه=
و اللي قطع عنّي جميع المراسيل=
وزلّته تعدل بمليون زلّه=
وان كان للمبدع بحبه محاصيل=
علّه وعلّه ثم علّه وعلّه=
من يوم صدّق هرجة القال والقيل=
صابر على هجره ولا قلت للّه=
روحي تحبه حب يطفح عن الكيل=
وهو يعذّبها..وهي ماتملّه=
لا من سكت خلاّ حياتـي تهاويل=
وإن قال كلمه زوّد الطين بلّه=
****