الوان الشفق

هذه القصيده اخر انتاج علي السبيه الغلبان
ان مريتم مشكورين وان طنشتم مشكورين

في حضرتك ياصاحبي تحضر الروح=وتغيب عني ياالغضي في غيابك
ماكن قلبي الا على الصاج مطروح=يلهب على جمر الغضى والتهابك
لو ما لعين الشوق نضرات والموح=ماكان شابت نضرتي في شبابك
خذني بقايا شوق وانفاس واجروح=وعين يملاها ملامح سرابك
لو تختفي نبرات شوقي من البوح=ذابت معاني لهفتي في كتابك
مالي بباقي الغيد غايه ومصلوح=عمري بدى بك يالغضي وانتهى بك
انت المليح اللي غلب كل مملوح=وانت الدوى ياصاحبي من عذابك
وشمس قلبي والبساتين والدوح=وليل المنى والخافق اللي سرى بك
رسمه من الوان الشفق زانة اللوح=وروضً اخضر يرتوي من سحابك
لفحه من الضي تطرد الليل واتلوح=وتكسف اقمار السماء من شهابك
وفي عيوني لك مدينه لها اصروح=والقلب قصرك والمعاليق بابك
في وصف غيرك راهج الصوت مبحوح=كل الحروف الابجديه تهابك
جنبك تجي كل المزايين وتروح=مايستقر الا لحضرة جنابك