مجالسي

الا يا الله دعيتك يا مجيب=دعيتك وانت من قلبي قريب
وروحي في مناجاتك تطيب=تسيرني على قول الثباتي
الا يا الله طلبتك يا كريم=طلبتك وانت رحمن رحيم
طلبتك وانت عن حالي عليم=ولا تخفى عليك الخافياتي
الا يا الله يا مبدي النجوم=الا يا الله يا مجلي الهموم
الا يا الله في حظ(ن) يقوم=ولا يشمت بنا راع الشماتي
الا يا الله في تقوى ودين=وتجعلنا هداة(ن) مهتدين
على سنة محمد مقتدين=وتجعلنا من اهل الحسناتي
تجمعنا عسى ذالجمع خير=عسى يشمل كبيره والصغير
وندعي الله فاولها واخير=يجنبنا الهروج المخطياتي
بعدها ودي اتمثل واقول=اقول اللي يبي الدنيا جهول
ترى الدنيا وما فيها يزول=ولا بعد الحياه الا المماتي
تفكر في جوابي يا مثيل=ومقل في كلامي يامقيل
وفكر فالنهايه والحصيل=وفكر فاللحود المظلماتي
ذكرت الله وانا عابر سبيل=ذكرت الله في عدل(ن) وميل
وبالله ما يبي يعمى الدليل= ولا يخطي العلوم الطيباتي
ترى الدنيا دوايرها تدور=ترى الدنيا وما فيها غرور
ومن يخلط حلاها بالمرور=يفكر فالقرون الماضياتي
ولا تسأل عن الدنيا طبيب=اسال اللي مجرب يا لبيب
ومن يسعى ويقنع بالنصيب=ويومن بالقضا والحاكماتي
تبون الصدق والعلم المفيد=بلا نقصا ولا علما يزيد
وجود الموت في حبل الوريد=من ايات الاله المحكماتي
انا شاعر وقاسيت الظروف=وعديت النوايب والصروف
لقيت الناس فالدنيا ضعوف=تشوف ازوال من تحت العباتي
نهار الخير يا كثر الحلول=وكلا قام في جنبك مثول
تقل ذولا يوفون الاصول=وانا جنب الرجال اللي ثقاتي
صحيح اللي تمثل يا رجال=تمثل من تجارب يوم قال
الى مالت ومال الدهر مال=محد حولك نهار النايباتي
في الدنيا ترانا وش نقول=تمعن في كلامي يا مثول
ترى الدنيا مقرتها تهول =سواة اللنش فوق الموج باتي
ان بنصحك يا زين الشباب=ترى الايام مجراها شباب
لكن احذر يجي للاش باب=صديق اللاش ما يهنا المباتي
لا بد المرء ما ياخذ صديق=لحيث انه من الوحده يضيق
لكنه يحتذر غدر الرفيق=ولو انه كريما بالصفاتي
ولا كذبتني شف وش يسير=شف العالم في الوضع الخطير
تناحر واشتباكات وغير=كبار القوم والنخبه جناتي
تعاهدنا وبالله ما نخون=مع قايد مسيرتنا نكون
ابو متعب تعداه الظنون=حزاة الخصم لطام العداتي
ودون المملكه يبدي رجال=رجالا ما يهابون القتال
وفاهم يوم يشتد النضال=يروون السيوف المرهفاتي
الا يا الله تحمينا وكان=وتكفيناى حواديث الزمان
تمكنا على دينك مكان=وجنبنا الدروب الموثماتي
ختام القول يا زين الختام=على اللي ناض من مكه وقام
صلاتي عالنبي سيد الانام=نبي الخير واتباعه هداتي