من ديوان الشاعر الكبير طلال السعيد

قصيدة أخرى


تعاتبنـي بنـظـرات خفـيـة
وأجاملها ولا ادري وش وراهـا
أجاوبهـا بنـظـرات حزيـنـة
تعبر عن ضنا الروح وشقاهـا
أسايرها وأجـاوب كـل نظـرة
وأخبي الوجد وأبحث عن رضاها
وعقب ما شفتها عرفـت قلبـي
تناساهـا ولكـن مـا نسـاهـا
غلاها يزود مـع زود الليالـي
وباع النـاس قلبـي واشتراهـا
وصرت أغار أنا منهـا عليهـا
خطا نفسي وآنا أتحمل خطاهـا
وأغار من أمها حتـى وأبوهـا
وأغار من الذي بأمـره ولاهـا
وأحسد اللـي تبـره بالرعايـة
وأحسد اللي بأحاسيسه رعاهـا
وأحسد البنز لا قامـت تسوقـه
أخاف أنـه يشاركنـي غلاهـا
وأحسد الريح لا حرك شعرهـا
وأحسد عيون غيري لا تراهـا
وأغار من القمر لا شـع نـوره
خذت نور القمر واصبح ضواها
وأحسد الشمس لا بانت عليهـا
أشعتهـا تسبـب فـي أذاهــا
وأحسد الأرض لا داست عليهـا
أثـر خطواتهـا تحيـي ثراهـا
وأغار من النجوم إليـا تعلـت
وشافتهـا وعينـي مـا تراهـا
وأغار من الهـدوم اذا لبستهـا
عساها مـا تجرحهـا عساهـا
واغار من الخواتم فـي يديهـا
وساعتهـا وكـل اللـي معاهـا
وأغار من القلادة فـي نحرهـا
وأغار من الشعر لامن كساهـا
وأغار من القصيـدة لا قرتهـا
ولو هي قصتي واشكي جفاهـا
وتشمل غيرتي حتـى المرايـا
يحـق لهـا بشوفتهـا تبـاهـا
نعم وأغار حتى مـن الوسـادة
وأحسد فراشهـا ويـا غطاهـا
آلا يا مـن يساعدنـي عليهـا
يوصلني هوى النفـس ومناهـا
عجزت أعالج جروحي بروحـي
جروح القلب ما تشفـى بلاهـا