%%% (( خيــــول المعتصم )) %%%

الصمت غيمه.. والحكي هتّان.. والبسمه بروق=
يعني قبل مانلفظ الكلمه لزوم ٍ نبتسم=
اللي يجي طيّب وصادق.. جيت له طيّب صدوق=
واللي يجي خاين وكذّاب أطرده برّا الحرم=
واللي يجينا شاهر ٍ سيفه نروّقه ويروق=
واللي يجينا ضيف يتفضّل ويبشر بالدسم=
الشعر له في خاطري ميزه وترنيمه وشوق=
يحتاجني مثل الورق.. وأحتاج له مثل القلم=
شاعر وعندي ذوق خاص ويختلف عن كل ذوق=
أرسم قصيده كنّها مخلوق من لحم ٍ ودم=
أكتب على كل البحور ..أعزف على كل الطروق=
وأمرار ياخذني الزعل .. وأمرار ياخذني العشم=
وأحيان أجي فظٍّ غليظ القلب .. راسي فوق فوق=
وأحيان يجرحني نسيم الليل وأحسّ الألم=
لاضاق صدري ترجف إضلوعي مع نبض الخفوق=
في وقتها حتى البشر مدري عرب والا عجم=
رغم الفروق الواضحه عاجز بتمييز الفروق=
واللي سألني : مايلاقي غير لا والا نعم=
في مهجتي برد وسلام.. وفيني آثار الحروق=
أغوص في عمق البحر.. ثمّ أرتفع 100 قدم=
كم شاعر ٍ من عادته يسرق ومن طبعه يبوق=
والناس قالوا : محترف جالس على راس الهرم=
يمديني أسرق مثلهم وأطغى على بند الحقوق=
مير البغال الحُمْر.. ماهي من خيول المعتصم=
*******