يازعيم الصيد علمت الحرار "

اليكم احبابي الاعزاء من اخر ماكتبت واعتذر على الاطاله :

يازعيم الصيد علمت الحرار=كيف لاحان القنص تقدر تصيد
كل طيرً بالسما علق وطار=يكفخ الجنحان ويتل الشريد
علم اللي نازلً وسط الديار=كيف قطاع الصحاري يستفيد
لو يقول البر مامنه انتصار=كان مااشفقتا على حب الشديد
كل نفسً تنشرح في شوف دار=لو رماها الوقت في دارً بعيد
واهني اللي تربع بالخضار=مستريحً بين ريضان وجريد
ماليً يمناه من قطف الثمار=وشابحً بالعين فالزرع الحصيد
مع رفيقً لابدت شمس النهار=فز كنه من حلا نومه طريد
زين فعل وطيب وشباب نار=وفالمواجب لاحظر ماله نديد
لو تدور بك الليالي ماستدار=صافيً لك لايحول ولايحيد
الرجال انواع واشكالً كثار=وكل رجلً شايفً نفسه فريد
وين رجلً لو عليك الدهر جار=جاك عند الكايده عون ورصيد
ووين رجلً لاغشاك الضيق ثار=ينزعج لاصار ماشافك سعيد
شحت الدنيا بمروين البكار=كاسبين الطيب والراي السديد
وعودت بقعاء بصكاتً كبار=وكشرت بالناب فالوقت الجديد
وانت يالعاقل على يدك القرار=تتخذ باللي تشوف انه يفيد
لاتخاوي واحدً ماله مسار=مرة ًينقص ومراتً يزيد
دايمً وايديه للطاله اقصار=حي وكن مافيه دم ولاوريد
الردي عرفه على العاقل دمار=يقطع السمعه مثل قطع الحديد
لو يشوفك شابكً في وسط غار=صد ماكنه يشوفك تستجيد
ان عزلت النفس منه وسط دار=وانطويت وصرت في دارك وحيد
خير من قولة غدى للناس عار=وخير من قولة يخاوي له بليد
عز نفسك واسلك دروب الوقار=وخل قلبك ساعة الشده شديد
واطلب اللي بالمطر بل القفار=واحدً كل الخلايق له عبيد
منجيً يوسف عقب طول انتظار=منذر الكفار باليوم الوعيد
رحمة الله دونها مابه ستار=الغني اللي على خلقه شهيد
ياالهي التجي لك بانكسار=وارتجي عفوك ومدك ياحميد
فرحتي قفت وانا مالي خيار=والتجي لك وانت تفعل ماتريد

تمت
احترامي..لكم