ذكاء مديرة .

هذه قصة بالفعل حصلت لإحدى المديرات ومعلماتها وأنا شفتها مكتوبة في إحدى المنتديات ونقلتها لكم .
أخليكم مع أحداث القصة :
يقولون الله يسلمكم أن فيه مديرة مدرسة فاتها قطار الزواج وقرّبت تعنّس 100% لأنها من النوع اللي يحب يجمع الدراهم ولا تبي أحد يشاركها في مرتبها ولذلك رفضت كل من طلب يدها للزواج ، المهم في يوم من الأيام غابت هذه المديرة عن المدرسة وأستمر غيابها لمدة أسبوع والمعلمات قَـلِـقـات عليها وزاد قـلقهن أنها ما ترد على جوالها ، وبعد أسبوع راحت للمدرسة مُـتعطّرة وعلى سنقة عشرة وكاشخة في لبسها ويوم شفنها المعلمات تجمّعن حولها يسألن عن سبب غيابها وليش ما ترد على الجوال ، طالعت فيهن وقالت : أنا تزوّجت !! المعلمات تشقـقن من الفرحة وبدأت الأسئله تنهمر عليها ، من هو سعيد الحظ ؟ وش مركزه ؟ وعسى ماعندك جارة ؟.... الخ .
قالت المديرة لهن : أنا متزوّجة زوج واحدة منكن ، يعني أنا ضرة لواحدة منكن ، نزل الخبر على المعلمات نزول الصاعقة على الجبال وكل واحدة ما قدرت ركبها تشيلها من الروعه والخوف وكل واحده خايفة أن يكون زوجها اللي سواها واللي جلست على الأرض واللي مسكت الكرسي حتى لا تطيح واللي فاقة كشرتها كأنها عند دكتور أسنان واللي تسنّدت على الجدار من الدوخة ، بعدها بدأت تنهمر عليها أسئلة الإستعطاف والترجي للمديرة ، يردن أن يعرفن من هو هذا الزوج . المديرة قالت لهن ما راح أعلمكن إلا بشرط ، كلهن وافقن وما عندهن مانع على هذا الشرط يردن يعرفن وبس ، قالت لهن : بكرة كل واحدة تجيب معها 500 ريال وإذا وقّعت في سجل الحضور تـتـركها عليه فإذا أخذت الــ 500 ريال فمعناتها أنه مو زوجها واللي أترك لها الفلوس على سجل الحضور تراه زوجها لأنه حرام آخذ زوجها وكمان آخذ فلوسها ، وافقن كلهن على الشرط ومن بكرة كل واحده تجي وتوقع على كشف الحضور وتـتـرك الفلوس وتروح تطل من الشباك . وكلّما وقّـعت واحدة منهن على الكشف خرجت وأخذت تناظر من خلال الشباك وقلبها يردع من الخوف وإذا قامت المديرة بأخذ فلوسها تـتـنـفـس الصّعداء وكأن الواحدة منهن مرشوشة بمويه باردة ، تجمّعن حول الشباك وصرن يقلن تلقـيـنه رجل فلانه لأنها ما بعد شرّفـت ، المهم جميع المعلمات الـ 24 وقّعن وأخذت المديرة الفلوس كلها فدخلن عليها مُعـصّبات وقلن لها وش هذا اللعب لم تــتركي شيء كل الفلوس حطـيـتـيـها في الدّرج ، نظرت إليهن وهي تبتسم إبتسامة صفراء وقالت لهن : أنا لا تزوّجت ولا أنخطــبـت كنت طوال الأسبوع الماضي مريضة قـلن لها : طـيّـب رجعي لنا فلوسنا قالت : معـصي ، من زمان وأنا أترجاكن نـتـساعد على فرش المصلى وتركيب برادة ماء ومكيفات وما فيه واحدة منكن تـبـرّعت بريال واحد وهذه الفلوس التي جمعتها منكن وقدرها 12000 ريال بأشتري بها فرش للمسجد ومكيفات وبرادة ماء ، المعلمات علتهن الفرحة والإنبساط بأن الخبر غير صحيح وقالت واحدة منهن لو تـبـيـن 100 ألف بس لا تقربي زوجي !!
...
وش رأيكم هل تصرف المديرة صائب أم لا ؟