يا تاج راس الجمال

قالت قصيدك جنون العشق في جوفه=وابياتك الشوق لحنها وغناها
قلت ابشري بالقصيد اتسابق احروفه=ما غيرك احدٍ قصيدي قد تمناها
انا اشهد ان القصيد ايشين وانعوفه=لامن نظمته بغيرك راح معناها
يحلى قصيدي عشان اعيونك اتشوفه=والا القصايد كثيره لا نظمناها
حتى القصيده الا شافتك مكسوفه=تبقى خجوله ويبقى الخوف يعناها
يا ملهمه جتني الأبيات مرصوفه=لان القصيده عشانك قام مبناها
رسمت لك في خيالي رسم واوصفه=البدر في صورته والشمس بسناها
ياتاج راس الجمال او قمة اطيوفه=لغيرك الحسن يستنكر ويتناها
روحك على خافقي والروح معطوفه=مرفوعة الشان في قلبي رسمناها
لك ينحني كل حرف او يعلن اكفوفه=وتعتذر لك قصيده قد نسجناها