تدرين لو كل الخلايق يصدون

تدرين لو كل الخلايق يصدون=وانتي معي لاقول هذا كفايه
تدرين ياروحي بقلبي يدورون=الشوق واللهفه لحد النهايه
انتي غرام الهمس مسكنك الأعيون=وارموشه اتغطيك بشت وعبايه
انتي حياته فيك هايم ومجنون=غطى على مجنون ليلى عنايه
انا اشهد ان القلب يا بنت مفتون=انتي رسمتي قصته والبدايه
انا رسمتك بالغلا حب وافنون=سويت نفسي كون وانتي سمايه
سويت لك في خافقي شي مضمون=لانك وفا كل الوفا يا شقايه
سويت لك في داخل الهمس مكنون=كتبت عاشقة الهوى لي كنايه
سريت افكر فيك ياكل ها الكون=وش لون اعيش ابدون خلي اوهوايه
سريت افكر فيك يا ساكن النون=احس بانفاسك شذا ياغلايه
بغيت اسلي خاطر خوف يدرون=ناسٍ معي وايبين سر الحكايه
بغيت اخلي الروح والقلب ينسون=واسرح بتفكيري واراجع صبايه
لقيت حبك سيف بالشوق مسنون=حتى وانا ناسي لقيتك معايه
لقيت بانك عالمٍ مابه اطعون=صافي يعطره النقاء والوفايه
شفت القمر يشكي على الشمس مغبون=والشمس تشكي له تراجع سنايه
شفت الكواكب كلهم لك يحيوون=كلٍ يقول من نورها جا بهايه