الذي ماقدر العشرة معي ماقدّره

لاتقولين انتهينا وانغلق عشرين باب
لاتقولين اقدر آحطم فؤداك واقهره

والله انك لو عرفتيني انا مثل الكتاب
أوله يجذبك ويشدك معه لين آخره

لاتقولين انت ماتحسب لخلق الله حساب
لاتقولين الذي يجهل هوانا يخسره

قلت لك لاتحسبين اني انا ناقص عذاب
أو احب اجذب فؤادك ثم اجي وآدمره

لكن اعطي من عطاني ما ترجيت الثواب
والذي ماقدّر العشره معي ماقدّره

لو سقيتيني من الما مابحثت عن السراب
لو عطيتيني حنانك ما تعمدت اني اخسره

لو عطيتيني وفا اعطي وفا من لاحساب
لين اصير بذمتي شجره تظلك مثمره

ان تكلمتي اقول احلى نغم واروع خطاب
وان سكتي قلت هذي ماتحب الثرثره

وان تنكرتي ترى ماني مثل طير الغراب
مايحط على غصون الا غصون العرعره

لي وطن لي ربع واحباب او صحاب
ذكرهم يوم اسمعه دايم ترى لي مفخره

الخطا مادام جا منك انتي ادرى بالصواب
كلنا نخطي ولكن مانحاول ننكره

نعتذر عما بدر يابخت من يخطي وتاب
والذي مايعترف لي بالخطا كيف اعذره

ليش ماجاني ولامرة ولو كلمة عتاب
كل ما جا منك يقطع بالفؤاد وينشره

مادريتي ان راسي فوق يتعدى السحاب
ارتفع عن كل تافه وان يشوفه يحقره

مادريتي ان حبك كان لي نجماً وغاب
مابقي لي منه شي اقدر اقول اتذكره

لاتقولين انتهينا وانغلق عشرين باب
انتي اللي انتهى بالاوله والآخره