في صدري مثل اللهيب وفي خفوقي جمره

من مبدأ ماني بطل بس في الحقيقه مكره = قمت أقلب في ثنايا أوراقي المنسيه
قبل لا قلبي على كبره يخونه صبره = قلت بعطي قسوة غيابك صفه شرعيه
كنت أقول السيل ما يبطي به الا كبره = أثر سيلك ما بطى به غير قل النيه
كل مانخى حظي العاثر عطاني ظهره = آه لو تدري غيابك ويش سوى فيه
في صدري مثل اللهيب وفي خفوقي جمره = استباحت كل مافيني بلا حنيه
والحزن مصبوب وسط القلب قطره قطره = ما ترك فرصه لقلبي يستريح شويه
هدني طاري فراقك وأخنقتني العبره = رغم أنف الكبرياء وقوة الشخصيه
لو كتبت الشعر جات القافيه منكسره = وصرت أحس ان القصايد كلها مرثيه
لو تعذر لي غيابك قلت باقبل عذره = كن دقات الخفوق تقول يالله حيه
لين يحظني وجودك وأرتمي في صدره = وارتوي وأشبع وأعيش احلامي الورديه
ماجتمع في قلب مخلوق الوله والحسره = لين صارت نظرته للكون سوداويه
أوعد همومي ببشرى رجعتك من بكره = خلها تبقى ورى ظهر الزمن مرميه