يامن تسائلت عنّي كم بلغ من عمر

هذه القصيده المتواضعه اخر انتاج علي السبيه الغلبان

يامن تسائلت عنّي كم بلغ من عمر=لو شفتني قلت هذا عمره الفين عام
فيني تجاعيد منحوته بكف الدهر=فيني علامات للحظ الردي والهيام
فيني تجارب معمّر رغم سن الصغر=عاصرتها من بداية عمري ابلا نضام
تحطّمت في مداري كل رحله تمر=وتشوف فيني ملامح من بقايا الحطام
في معمعة وقت مايوصل ضحاه العصر=والشمس عامت وغابت في بحور الظلام
والحظ الاقشر ملازمني بليا عذر=كسر جناح الصقر وازهق هديل الحمام
مايسعد الحال لا سيطر عليه الفقر=والصمت يشهر سيوفه في نحور الكلام
ازريت اجاري السنين الغابره والقفر=وازريت ازحزح مهمات الامور الجسام
ياحضي العاثر اللي في مسيره عثر=وطاح في غيهب اوهامه ولاعد قام
كسرت قلبي وكسر القلب ما ينجبر=والوصل من سبتّتك بيني وبينه خصام
سن الطفوله كساه الشيب ثم احتضر=كمله ينازع وموته بين الاجفان نام
هذا هو العمر نبذه موجزه من خبر=تبقى شواهد على واقع كثير الملام