%%% (( """ رحت للحـــــاره """" )) %%%

رحت للحاره ودمعي ماقدرت أمنع نزوله=
شفت منزلنا القديم وذكرياتي في جداره=
حشرجت فيني دموع الممتثل لحظة مثوله=
غصب عن قلبي بكيت ودمعتي مو بإختياره=
آآه يادنيا تغيّر بيتنا .. عرضه وطوله=
ماقدرت أسقي ثراه .. ولاقدرت أنفض غباره=
صحت بأعلى صوت والتفكير شارد في ذهوله=
قمت أدوّر لي عباره مالقيت ولا عباره=
وقتها مامرّ في عيني سوى نظره خجوله=
ولاتجمّع في لساني غير كلمة ياخساره=
يوم كنت أكبر مراهق وانتهى وقت الطفوله=
صرت عازف عود إلى غنّيت بكّيت الحجاره=
كان باص الطالبات يشوقني لحظة وصوله=
كنت أفوّتها صلاة الظهر وأجلس فـ إنتظاره=
كان محبوبي يجمّع طالبات الباص حوله=
كان يشّر باليمين وترفع الطرحه يساره=
كان يشرح للبنات إنّي أنا غاية ميوله=
يوم كانت وقفته مابينهم مثل المناره=
كنت أشوف إنّي ملك يحكم على عشرين دوله=
مير صرت اليوم .. ميّت قبل ساعات إحتظاره=
يازماني مابقى لي فالهوى شيّ (ن) أقوله=
الحزن خيّم عليّه والعمر عدّى قطاره=
فالنهاية ذكرياتي كانت أيّام الطفوله=
ياخساره يازماني ياخساره ياخساره=
*****