تغريده

ارتشفتك حب عذري والبعاد اضناني=زيد لي من حبك الله لايهينك زيده
وارتجفتك من براد العشق والتحناني=واصطليت البعد نار وشبّني تصعيده
وارتويتك شعر رغم ان الخيال اعياني=هات من عذب القصيد وحِلّ لي ترديده
لملم حروفه على شفاتك وصَفّ الداني=وانثره بلسانك الفاتر وعد تغريده
وارتويتك همس وآهات وشغف واشجاني=تلتقي آهاتنا وتذوب في تنهيده
كلّ ما صحيت جمرك في لظى وجداني=خذته بفمي حبسته لي طفيت وقيده
ثم اجي مشتاق له وتجي تُشبّه ثاني=ثم اعوّد خوف بعد شوي ابي تخميده
كم سهرتك ليل ساعاته قضت ما امداني=وكم توقّف عقرب الساعه على تسهيده
وكم سريتك درب مدري كيف لك وداني=والمصيبه الفرصه البيضا عليه وحيده
مختلط حسّ السعاده والوله واحزاني=لا تقلْ ليه الحزن دام المسافه بعيده
كل ما راجعت ذكرى الامس واللي كاني=قلت هذا الشي مَقَدر ما عنه تحييده
والله اني اهرب من التفكير بعض احياني=بالذي ممكن يصير ويحصل وتعقيده
مثل لو قلبي فقد في لحظةٍ شرياني=كيف وانت القلب والشريان وانت وريده