حزن الزفير.. ودمع الشهيق

مساؤكم شعر
أتمنى أن تنال الحد الأدنى من الرضى

يا صاحبي غيبتك تفتح لحزني مجال=ودي أضمًك عشان أقطع عليه الطريق
لا نام غصن المودًه في خفوقي ومال=لا تتركه للغياب المر خلًه يفيق
عصرت لك غيمة أشواقي قراح وزلال=وصار لك فكري المسجون حرً وطليق
داويت جرح الإجابه من دموع السؤال=وداريت حزن الزفير وبان دمع الشهيق
ماني مراهق ولا أدري كيف لعب العيال=أمًا أعتبرني خوي والا أعتبرني صديق
ماقصد بشوقي غزل ومراهقات وهبال=الا خلايا مناحيل وزهور ورحيق
ياللي رحيلك جريمه تشبه الأغتيال=شطرٍ كتبته زمان وشبً صدري حريق
ليت الموده يرجعها دعا وإبتهال=كان أصبح البعد بإحساسي حنون ورفيق
لا شفتني بين حد الحل والإرتحال=عطني يدك وأنتشلني وأعتبرني غريق
مأكبر من الغيبه الا كبر دمع الرجال=ولاكبر من الهيبه الا لا تهاوى طويق
أهم شي خل ما بين القلوب إتصال=عادي ترى كل دمعي في غيابك يليق
لا صار دمع الإجابه في عيون السؤال=بتنفًسك عشق لا تسمح لصدري يضيق